《煮個麵你食》
今日同班兄弟係Whatsapp吹吹吓水講起最近情況，先發現依家幾位太太都係處於停業或失業狀態，大家都一副I Know that feel Bro嘅感覺。
老婆要停業，佢同我講，如果咁樣落去再多兩個月，真係連日常生活都會有問題，我哋兩個一向都財政獨立，聽到佢咁講，我只可以安撫一吓佢，我努力少少搵多d，你唔好擔心太多喇，萬大事，有我。
現代社會夫妻之間公一份婆一份係常態，有幾多個可以一個養起全家，更何況有唔少人有小朋友，開支同洗費更大，而作為老公，只可以將膊頭獻出，撐起成頭家。
記得有一次，我因為工作上面出問題而出現財政困難，心情當然係唔好，一件小事就令我大發脾氣，當講完一輪之後，老婆同我講，你有咩事就攤出嚟講，大家拆掂佢，唔好亂發脾氣，我都有積蓄同金器，大不了就賣咗佢周轉吓。
最後，難關過咗，但第二個難關又嚟，突然屋企漏水要裝修，老婆將金器拎去賣咗，雖然……金器平時都唔會用，但存在嘅意義真係好大，佢賣個刻有幾難受我都知道。
一關過完又一關，疫情再爆發，佢要停業，而我都水靜河飛，佢問我點好，講真，我都覺得自身難保，可以點，但生活總要過，路總要走，唯有努力去改變。
正所謂，共富貴易，共患難難，但結得婚，大家點會唔捱落去，我唔相信人人都會大難臨頭各自飛，但我想講嘅係，係患難之際，兩個人都要保持返心情，有咩事就大家溝通，支持，唔好將負能量發放出嚟。
或者你一個擁抱，一個親吻，煮個麵你食等等，都可以令對方再次充滿力量去走呢條艱難嘅路。
就好似《老婆最後的十二個難題》行山篇咁，行山好辛苦：
有人選擇一路行一路嘈，問點解要行條咁難行嘅路，邊個要負責任，邊個要承擔咁；
有人會一路行一路唱吓歌，傾吓計，你扶吓我我扶吓你，一步一步行，時候到了，便可以係山頂睇到最漂亮嘅美景，亦會成為你同佢嘅重要回憶。
好多人覺得結婚係講夾唔夾，講有冇條件等，而我覺得，最緊要係心態好。
Search